Finnmárkku Dearvvašvuohta ja SÁNAG ávvudeaba rahpama čakčamánu 22. beaivve

Gaskal 13- 18 jagi
Ossodat lea dat vuosttas jándorossodat psykalaš dearvvasvuođasuodjalusas Finnmárkkus mii fállá iskkademiid ja dálkkodeami nuoraide gaskal 13 ja 18 jagi. Dat vuosttas nuorat bohtet juo vahkku mannjil rahpama áibbas ođđa rusttegii gos leat guhtta saji. Njeallje dáid sajiin leat buot nuoraide Finnmárkkus, ja guokte leat erenoamážit várrejuvvon sámi nuoraide miehtá riikka.

Viiddes fálaldagat
Nuoraidpsykiatriija ossodat boahta dálkkodit máŋggalágan váttuid nugo borranváttuid, psykosaid, sisbalu/lossamiela, sajáiduvvanváttuid, iešskáibmema ja gárrenmirkko- ja iešsorbmenváttisvuođaid. Juohkehaččas lea sierra dálkkodanjoavku gos lea psykiater, erenoamášpsykologa, erenoamášpedagoga ja birasterapeuta. Ossodaga 21 bargi galget  sihke čielggadit ja dálkkodit.

Heivehuvvon juohkehažžii
Dálkkodeapmi heivehuvvo juohkehažžii  birasterapiija, oktagaslaš terapiija ja čielggademiid vuođul gos lagaš ovttasbargit leat divššohasa fierpmádat ja bearaš. Nuorat sáhttet leat ossodagas mánus gitta 8 mánnui.

Sierra skuvla ossodagas
Finnmárkku fylkkagielda jođiha min skuvlla. Leavnnja joatkkaskuvllas lea fágalaš ovddasvástádus, ja fállá oahpahusa mánáide ja nuoraide vuođđoskuvllas ja nuoraide joatkkaskuvllas. Skuvlla erenoamášpedagogat barget ovttas nuoraidpsykiatriija ossodaga divššodeaddjiiguin Kárášjogas.

Nuoraidpsykiatriija juogus Universitehta buohcceviesus Romssas hálddaša fáhkkaveahki doaimmaid nugo ovdal.