Karen Sara Wilhelmsen lea dat sámi terapeuta gii lea guhkemusat bargan ja geas lea eanemus klinihkálaš liigeoahppu SÁNAG:is. Son lea 1990 rájes bargan MNP-Kárášjogas, terapeutan ja maiddái jagi jođiheaddjin poliklinihkas. Dál lea Káre bearašossodagas bearašterapeuta.

Káres lea liigeoahppu klinihkalaš pedagogihkas, stoahkanterapiijas, bearašterapiijas, diehtomáhtolaš terapiijas ja oahppu Marte Meo metodas. Dasa lassin lea sus maid oahppu árbevirolaš juoigamis ja máinnasteamis. Káre lea áŋgirit bargan juo lagabui 20 jagi das ahte fállat bálvalusaid sápmelaččaide. Son lea maid astan bagadallat 3 studeantta klinihkalaš pedagogihkas. Guovttis bargaba SÁNAG:is ja okta fas MNP-Álttas.

Sidjiide geat jáhkket ahte Káre lea geargan oahpu gazzamis ferte dušše namuhastit ahte 2010:s álgá son maŋemus osiin master oahpustis.

- Mun sihke čevllohalan ja njuorrasan dán ánssášumi dihte, logai Karen Sara Wilhelmsen go válddii vuostá skeaŋkka mannan bearjadaga Suoločielggis, gos SÁNAG čađahii jahkásaš plánenbeivviid.