SÁNAG ja Divttasvuona gielda leaba gárven šiehtadusa mas oaiveulbmilin lea sihkkarastit ahte psykiatriija bálvalusaid geavaheaddjit ožžot heivehuvvon fálaldaga spesialistadearvvašvuođa ja gielddadearvvašvuođa nana ovttasbarggu čađa. Ovttasbargu guoská sihke mánáid, nuoraid ja rávisolbmuid ektui.

Čoahkkimis leigga Divttasvuona bealis konstituerejuvvon ráđđealmmái Lill-Tove Hansen ja Vanja Skogvold, gii jođiha psykiatriija bálvalusa. SÁNAG:s bođiiga jođiheaddji Gunn Heatta ja báikkálaš kánttuvvraid prošeaktajođiheaddji Tone Finnesen. Skogvold ja Finnesen leaba hápmen šihtadusa maŋŋá ságastallamiid doavtterbálvalusain, rabas fuolahusain ja gieldda basisjoavkkuin. Ovttasbargu lea bistán dan rájes go Divttasvuona kántuvra rahppui ja olu bealit das doibmet juo bures.

- Ovttasbargu lea dađi mielde šaddan buoret ja áššit doibmet dál eanet at eanet nu mo galget, lohká Vanja Skogvold. Son čujuha o.m.d. šiehtadusa 7. čuoggái ja lohká ahte SÁNAG áŋgirit lea buktán fálaldagaid mat gusket gelbbolašvuođaloktemii. Lea biddjon juo johtui mánnosaš oahpahusráiddut gielddas gos SÁNAG addá oahpahusa iešguđetge fáttáin. SÁNAG fállá maid hospiterema, muhto dássážii gal ii leat gielddas oktage lohkan ahte sii háliidit dan, dadjá son.

- Lea buorre go šiehtadus dál lea formálalaččat sajis danin go dat eanet geatnegahttá min, lohká Gunn Heatta. Lea juo mearriduvvon ahte galget ceggejuvvot fágaidrastildeaddji joavkkut juohke báikkálaš kánttuvrra nammii gos dárbbu mielde sáhtta veahki oažžut SÁNAG:is. Doaivva lea ahte dáid joavkkuide ovddemusat biddjojivčče báikki olbmot.

Šiehtadusa bealálaččat leat Finnmárkku Dearvvašvuohta SÁNAG bokte, buot ossodagaiguin, ja Divttasvuona gielda.

Čálalaš doaibmabijut šiehtadusa 12. čuoggá ektui leat juo gárvvistuvvomin, ja buktojit ovdán farggamusat.

Leaŋggas vulobealde gávnnat šiehtadusa. Fuom: Lea dárogillii.