Mánáidsuodjalusoahppi guovttos Ingvild Øvermo (Fredrikstad) ja Marte Dahle Johansen (Kristiansand) Finnmárkku Allaskuvllas loahpaheaba dál golmma mánu hárjehallama min luhtte.  

Goappašagas lea hirbmat buorre govva hárjehallansajis. Soai lohkaba iežaska váldon bures vuostá lahttudeaddji birrasis, leaba leamaš mielde veaháš mas ge ja maiddái deaivan olu erenoamáš olbmuid, sihke bargiid ja divššohasaid gaskkas. 

- Hárjehallan áigodat Kárášjogas lea leamaš hirbmat buorre vásáhus. Moai letne oahppan olu, sihke barggu ja iežame birra. Erenoamážit letne oahppan man dehálaš lea ahte olbmos eai leat ovdagáttut, lohká Ingvild.

Ingvild ja Marte dovdaba mielbargiid iežaska váldán duođalaččat, vaikko eaba leat leamaš "eara go" oahppit. Lea sunno mielas leamaš dego dábálaš bargu, ii ge hárjehallansadji. Báiki lea unni ja čađačuovgi. Olbmuid geaid aiddo lea dikšun, deaivá fas maŋŋá buvddas, nu ahte diet maid lea leamaš hástalussan sunnuide.

Dat mii kulttuvrra ja sámevuođa osiide guoská, lohkaba goappašagat ahte SÁNAG:is leat olu sámi govastagat nugo dáidda ja čiŋat juohke sajis ovttadagain. Dat lea sunno mielas hirbmat buorre. Vaikke dáppe leat juo oalle máŋga sámi terapeutta, de oaivvildeaba soai ahte ledje juollut vel eambbosat.

Ingvild Øvermo hárjehalai MNP:as gos Berit Gaup lei bagadalli. Marte Dahle Johansen:a hárjehallan lei fas aiddo rahppojuvvon mánáid ja nuoraid psykiatriija ossodagas. Sus lei Berit Anette Somby bagadallin.

- Moai letne erenoamáš duđavačča ja bohte rápmot din buohkaide. Ja moai gal áinnas bohte ruovttoluotta, loahpaheaba oahppi guovttos ovdal go doapmaleaba viidáset čállit ges iežaska skuvllabargguid.